You may like these

		活塞男一夜夫妻萬四蚊...查實嗰塊仰卧起坐板總值14,830元，係美國入口貨，03年2月起已經裝咗喺觀塘碧雲道藍田公園。連埋活塞男玩爛嗰塊，全港只得18套，屬於康文署珍貴資產。當晚因為活塞男無法自拔，同塊鐵板難捨難離，接call到場嘅一眾消防大佬惟有忍痛鋸開塊板四隻腳，連人帶板送去醫院搶救。活塞男身體重要部位幸保不失，但塊鐵板就已經報銷唔用得。既然塊板咁珍貴，o依家無端端俾人玩爛咗，署方當然唔可以當冇事發生。據講康文署內部有人認為，今次事件純粹有人貪一時之快，做出鹵莽行為引致損壞公物，完全同塊仰卧起坐板上面嘅小孔設計冇關，所以有足夠法律理據向有關人等追討賠償，不過究竟點賠法同埋賠幾多，o依家仲未有定案。律師梁永鏗對呢單笑料記憶猶新，佢對八方講，如果康文署真係要向活塞男討回公道，而活塞男又唔認數令事件告上法庭，署方最緊要證明活塞男當晚引致意外嘅行為，唔係一般正常人會做嘅行為，例如喺公眾地方除褲做出一啲淫褻動作。至於活塞男最終要賠幾多，梁律師話好難講，事關法官多數會判賠償塊鐵板當年購入之後嘅折舊價，安裝費、搬運費呢啲使唔使賠A完全視乎法官點判。而活塞男日後如果敗訴賠咗錢，可唔可以攞番塊板留念，都由法官決定。

5 comments